తెలంగాణ ఇంటర్ విద్యార్థులకు ఇది ముఖ్యమైన వార్త. రాష్ట్రంలో వార్షిక పరీక్షల షెడ్యూల్‌ను మార్చేందుకు ఇంటర్ బోర్డు సిద్ధమైంది. జేఈఈ, నీట్ వంటి జాతీయ స్థాయి ప్రవేశ పరీక్షలకు విద్యార్థులకు తగిన సమయం ఇచ్చే లక్ష్యంతో, ఈసారి ఫిబ్రవరి చివరి వారం నుంచే పరీక్షలు ప్రారంభించాలని భావిస్తోంది. ఈ మేరకు ప్రభుత్వ ఆమోదం కోసం దస్త్రాన్ని పంపింది.
విశ్వసనీయ వర్గాల సమాచారం ప్రకారం, 2026 ఫిబ్రవరి 23 లేదా 25వ తేదీ నుంచి పరీక్షలు ప్రారంభించేందుకు వీలుగా రెండు వేర్వేరు టైం టేబుళ్లను రూపొందించి, ప్రభుత్వానికి సమర్పించినట్లు తెలిసింది. ముఖ్యమంత్రి రేవంత్ రెడ్డి విద్యాశాఖ మంత్రిగా కూడా బాధ్యతలు నిర్వర్తిస్తున్నందున, ఆయన ఆమోదముద్ర వేసిన వెంటనే అధికారిక షెడ్యూల్ వెలువడనుంది. పొరుగు రాష్ట్రమైన ఏపీలో కూడా ఫిబ్రవరి 23 నుంచే పరీక్షలు మొదలుకానున్న నేపథ్యంలో తెలంగాణలోనూ అదే తరహాలో నిర్వహించాలని బోర్డు యోచిస్తోంది.
గతంలో ఇంటర్ పరీక్షలు ఫిబ్రవరిలోనే జరిగేవి. కానీ, కరోనా మహమ్మారి కారణంగా కొన్నేళ్లుగా మార్చి నెలకు వాయిదా పడుతూ వస్తున్నాయి. దీనివల్ల జేఈఈ మెయిన్, ఎంసెట్, నీట్ వంటి పోటీ పరీక్షలకు సిద్ధమయ్యే విద్యార్థులు తీవ్ర ఒత్తిడికి గురవుతున్నారు. ఉదాహరణకు గతేడాది మార్చి 5న ఇంటర్ పరీక్షలు ప్రారంభం కాగా, ఏప్రిల్ 2 నుంచే జేఈఈ మెయిన్ తుది విడత మొదలైంది. దీంతో ప్రిపరేషన్‌కు కేవలం 12 రోజుల సమయం మాత్రమే లభించింది. ఈ ఇబ్బందిని అధిగమించేందుకే ఈసారి వారం రోజుల ముందుగా పరీక్షలు నిర్వహించాలని బోర్డు నిర్ణయించింది.
పరీక్ష ఫీజుల పెంపు ప్రతిపాదన
ఇదే సమయంలో, పరీక్ష ఫీజులను పెంచాలంటూ ఇంటర్ బోర్డు ప్రభుత్వానికి మరో ప్రతిపాదన పంపింది. ప్రస్తుతం ప్రాక్టికల్స్ లేని కోర్సులకు రూ. 520, ఎంపీసీ, బైపీసీ వంటి ప్రాక్టికల్స్ ఉన్న కోర్సులకు రూ. 750 చొప్పున ఫీజు వసూలు చేస్తున్నారు. ఏపీ, సీబీఎస్ఈ వంటి ఇతర బోర్డులతో పోలిస్తే తెలంగాణలో ఫీజులు తక్కువగా ఉన్నాయని, వాటిని సవరించాలని బోర్డు కోరింది. ప్రభుత్వ ఆమోదం లభిస్తే, ప్రాక్టికల్స్ లేని కోర్సులకు ఫీజు రూ. 600కు, ప్రాక్టికల్స్ ఉన్నవాటికి రూ. 875కు పెరిగే అవకాశం ఉంది. కాగా, ఈ ఏడాది రాష్ట్రవ్యాప్తంగా ప్రథమ, ద్వితీయ సంవత్సరాల్లో కలిపి సుమారు 9 లక్షల మందికి పైగా విద్యార్థులు పరీక్షలకు హాజరుకానున్నారు
