నూతన సంవత్సర వేడుకల సందర్భంగా డిసెంబర్ 31వ తేదీ రాత్రి దేశవ్యాప్తంగా ఆన్లైన్ ఫుడ్ ఆర్డర్లు వెల్లువెత్తాయి. ప్రముఖ ఫుడ్ డెలివరీ సంస్థ స్విగ్గీ, భారతీయుల ఫుడ్ ఆర్డర్ల ట్రెండ్స్కు సంబంధించిన ఆసక్తికరమైన వివరాలను వెల్లడించింది. ఎప్పటిలాగే, ఈసారి కూడా బిర్యానీ తన ఆధిపత్యాన్ని నిరూపించుకుంది.
స్విగ్గీ తెలిపిన వివరాల ప్రకారం, డిసెంబర్ 31న రాత్రి 7:30 గంటల లోపే దేశవ్యాప్తంగా 2,18,993 బిర్యానీ ఆర్డర్లు నమోదయ్యాయి. హౌస్ పార్టీలు, స్నేహితుల గెట్-టుగెదర్లలో బిర్యానీనే అత్యంత ప్రజాదరణ పొందిన వంటకంగా నిలిచింది. ఇక ఫాస్ట్ ఫుడ్ విభాగంలో బర్గర్లకు మంచి ఆదరణ లభించింది. సుమారు 90,000కు పైగా బర్గర్లు డెలివరీ అయ్యాయి.
అయితే, అందరూ పార్టీ మూడ్లోనే లేరు. కొందరు సంప్రదాయ వంటకాలైన కిచిడీ (9,410), ఉప్మా (4,244)లను ఆర్డర్ చేసి తమ ఇష్టాన్ని చాటుకున్నారు. ఇక ఆరోగ్య స్పృహ ఉన్నవారు కూడా తమ ఉనికిని చాటుకున్నారు. ఒక్క బెంగళూరులోనే 1,927 మంది సలాడ్లు ఆర్డర్ చేయడం విశేషం.
స్వీట్ల విషయానికొస్తే, గులాబ్ జామూన్ టాప్లో నిలిచింది. మొత్తం 46,627 గులాబ్ జామూన్ ఆర్డర్లు రాగా, 7,573 మంది క్యారెట్ హల్వాను ఇష్టపడ్డారు. పార్టీ ముగిశాక కూడా చాలామంది చాయ్ తాగే సంప్రదాయాన్ని వదల్లేదు. అర్ధరాత్రి వేళ 29,618 చాయ్ కప్పులు ఆర్డర్ అయ్యాయి. మొత్తంగా, ఈ గణాంకాలు భారతీయ ఫుడ్ కల్చర్లోని వైవిధ్యాన్ని సరదాగా కళ్లకు కట్టాయి.
