విజయవాడలో ట్రాఫిక్ పోలీసులు విధి నిర్వహణలో ఓ బండిని, దానికున్న నెంబరు ప్లేటును చూసి విస్మయానికి గురయ్యారు. ఆ బండి నెంబరు ప్లేటుపై నెంబరుకు బదులుగా మాఫియా అని రాసి ఉంది. బెజవాడలోని ఓ సర్కిల్ వద్ద ట్రిపుల్ రైడింగ్ ను గమనించిన ట్రాఫిక్ పోలీసులు ఆ బండిని ఆపారు. నెంబరు కోసం చూడగా, మాఫియా అని రాసి ఉన్న అక్షరాలు కనిపించాయి.
ఈ నెంబరు ప్లేటు ఏంది తమ్ముడూ… ఇన్సూర్డ్ బై మాఫియా అని రాసి ఉందేంట్రా. ఇదేం నెంబరు ప్లేటురా…. నేనెప్పుడూ చూడలేదు… కొత్తగా ఉంది ట్రాఫిక్ పోలీసు ఆశ్చర్యం వ్యక్తం చేశాడు. మాఫియా ఏందిరా… ఏ మాఫియారా మీరు… అంటూ ప్రశ్నించారు. అంతేకాదు, బైక్ సైలెన్సర్ ను కూడా మోడిఫై చేసి ఉండడం గుర్తించారు.
కాగా, ఆ బైక్ ను ఇటీవలే వేరే వ్యక్తి నుంచి కొనుగోలు చేశానని, అయితే నెంబరు ప్లేటును మార్చకుండా అలాగే ఉంచానని సదరు బైకర్ వెల్లడించాడు. దాంతో, ట్రాఫిక్ పోలీసులు అప్పటికప్పుడు ఆ కుర్రాడ్ని ఇంటికి పంపించి నెంబరు ప్లేటు తెప్పించి, అక్కడే రోడ్డుపైనే బండికి బిగించారు. దీనికి సంబంధించిన వీడియో వైరల్ అవుతోంది.
