భారత స్టాక్ మార్కెట్లలో నేడు అమ్మకాల ఒత్తిడి స్పష్టంగా కనిపించింది. ఓవైపు కీలక సూచీలు భారీ నష్టాల్లోకి జారుకోగా, మరోవైపు బంగారం ధరలు సరికొత్త రికార్డులను సృష్టించాయి. అంతర్జాతీయంగా నెలకొన్న ఉద్రిక్తతల నేపథ్యంలో ఇన్వెస్టర్లు సురక్షిత పెట్టుబడి సాధనంగా భావించే పసిడి వైపు మొగ్గు చూపడంతో ఈ భిన్నమైన పరిస్థితి నెలకొంది.
ఈ ఉదయం ట్రేడింగ్ ప్రారంభం నుంచే మార్కెట్లు నష్టాల బాట పట్టాయి. సెన్సెక్స్ 185 పాయింట్ల నష్టంతో 81,917 వద్ద మొదలైంది. నిఫ్టీ సైతం 50 పాయింట్లు తగ్గి 25,108 వద్ద ప్రారంభమైంది. సమయం గడిచేకొద్దీ నష్టాలు మరింత పెరిగాయి. ఉదయం సెషన్లో సెన్సెక్స్ సుమారు 350 పాయింట్లు (0.43 శాతం) పతనం కాగా, నిఫ్టీ 102 పాయింట్లు (0.41 శాతం) నష్టపోయి 25,067 వద్ద ట్రేడ్ అయింది.
ఐటీ, ఎఫ్ఎంసీజీ, ప్రైవేట్ బ్యాంక్, ఆటో, ఆయిల్ అండ్ గ్యాస్ వంటి కీలక రంగాల షేర్లు నష్టాలను చవిచూశాయి. నిఫ్టీ ఐటీ సూచీ 0.81 శాతం క్షీణించి 34,963 వద్ద కొనసాగింది. బ్రాడర్ మార్కెట్లోనూ ఇదే ధోరణి కనిపించింది. నిఫ్టీ మిడ్క్యాప్ 100 సూచీ 0.30 శాతం తగ్గింది. అయితే, దీనికి భిన్నంగా నిఫ్టీ స్మాల్క్యాప్ 100 సూచీ మాత్రం లాభాల్లో ట్రేడ్ అవ్వడం గమనార్హం.
సెన్సెక్స్-30 షేర్లలో టెక్ మహీంద్రా 1.17 శాతం నష్టంతో టాప్ లూజర్గా నిలిచింది. టాటా మోటార్స్ (-1.66 శాతం), భారతీ ఎయిర్టెల్ (-0.98 శాతం), ఐసీఐసీఐ బ్యాంక్ (-0.91 శాతం) వంటి షేర్లు కూడా నష్టపోయాయి. మరోవైపు, ట్రెంట్ (+0.68 శాతం), మారుతీ సుజుకీ (+0.70 శాతం), టాటా స్టీల్ (+0.47 శాతం), ఎస్బీఐ (+0.35 శాతం) షేర్లు లాభపడ్డాయి.
ఇక బంగారం మార్కెట్ విషయానికొస్తే, అంతర్జాతీయ ఫ్యూచర్స్ మార్కెట్లో ఔన్సు బంగారం ధర 3,790.82 డాలర్ల వద్ద ఆల్ టైం రికార్డు సృష్టించింది. ఎంసీఎక్స్లో పసిడి ధర రూ. 1,13,483 వద్ద కొత్త గరిష్టాన్ని నమోదు చేసింది. అంతర్జాతీయ ఉద్రిక్తతలు, అమెరికా టారిఫ్ ఆందోళనల నేపథ్యంలో ఇన్వెస్టర్లు బంగారం కొనుగోళ్లకు మొగ్గు చూపడమే ఈ ర్యాలీకి ప్రధాన కారణంగా విశ్లేషకులు చెబుతున్నారు.
