భారత ఏరోస్పేస్ రంగంలో ఒక చారిత్రాత్మక ముందడుగు పడింది. టాటా గ్రూప్‌కు చెందిన ఏరోస్పేస్ విభాగమైన టాటా అడ్వాన్స్‌డ్ సిస్టమ్స్ లిమిటెడ్ (టీఏఎస్ఎల్), యూరోపియన్ విమానయాన దిగ్గజం ఎయిర్‌బస్‌తో కలిసి కర్ణాటకలో హెలికాప్టర్ల తయారీ కేంద్రాన్ని ఏర్పాటు చేయనుంది. ప్రైవేట్ రంగంలో దేశంలో ఏర్పాటవుతున్న మొట్టమొదటి హెలికాప్టర్ ఫైనల్ అసెంబ్లీ లైన్ (ఎఫ్ఏఎల్) ఇదే కావడం విశేషం. ఈ ప్రాజెక్టుతో ఫ్రాన్స్, అమెరికా, బ్రెజిల్ తర్వాత ఎయిర్‌బస్ హెచ్125 హెలికాప్టర్ల అసెంబ్లీ లైన్ కలిగిన నాలుగో దేశంగా భారత్ అవతరించనుంది.
కర్ణాటకలోని కోలార్ జిల్లా బెంగళూరు సమీపంలోని వేమగల్ ఇండస్ట్రియల్ ఏరియాలో 7,40,000 చదరపు అడుగుల విస్తీర్ణంలో ఈ ప్లాంట్ నిర్మాణ పనులు ప్రస్తుతం శరవేగంగా జరుగుతున్నాయి. 2026 నాటికి ఈ కేంద్రంలో కార్యకలాపాలు ప్రారంభించాలని లక్ష్యంగా పెట్టుకున్నారు. ఇక్కడ ప్రపంచవ్యాప్తంగా అత్యంత ప్రజాదరణ పొందిన సింగిల్ ఇంజిన్, తేలికపాటి యుటిలిటీ హెలికాప్టర్ అయిన ఎయిర్‌బస్ హెచ్125 తయారీ, ఫైనల్ అసెంబ్లీతో పాటు నిర్వహణ, మరమ్మతు, ఓవర్‌హాల్ (ఎంఆర్‌వో) కార్యకలాపాలు కూడా చేపట్టనున్నారు. ప్రాథమికంగా ఏడాదికి 10 హెలికాప్టర్లను ఉత్పత్తి చేయాలని, రాబోయే రెండు దశాబ్దాల్లో ఆసియా-పసిఫిక్ రీజియన్‌లో 500కు పైగా హెచ్125 శ్రేణి హెలికాప్టర్లకు డిమాండ్ ఉంటుందన్న అంచనాల నేపథ్యంలో ఉత్పత్తి సామర్థ్యాన్ని పెంచాలని యోచిస్తున్నారు.
ఈ ప్రాజెక్టుపై కర్ణాటక పరిశ్రమల శాఖ మంత్రి ఎం.బి. పాటిల్ హర్షం వ్యక్తం చేశారు. “ఇది చరిత్రాత్మక మైలురాయి. భారతదేశపు మొట్టమొదటి ప్రైవేట్ రంగ హెలికాప్టర్ ప్లాంట్ ఇది” అని అన్నారు. దేశ ఏరోస్పేస్, రక్షణ రంగ ఉత్పత్తుల్లో కర్ణాటక ఇప్పటికే 65 శాతం వాటాతో అగ్రస్థానంలో ఉందని, ప్రపంచవ్యాప్తంగా ఈ రంగంలో మూడో స్థానంలో ఉందని ఆయన గుర్తుచేశారు.
ప్రధాని నరేంద్ర మోదీ ప్రతిష్ఠాత్మకంగా చేపట్టిన ‘మేక్ ఇన్ ఇండియా’ కార్యక్రమానికి ఈ ప్లాంట్ ఏర్పాటు మరింత ఊతమివ్వనుంది. దీనివల్ల దేశీయ ఏరోస్పేస్ తయారీ రంగం బలోపేతం కావడంతో పాటు, నైపుణ్యం కలిగిన అనేక మందికి ఉపాధి అవకాశాలు లభిస్తాయి. ఏరోస్పేస్ రాజధానిగా కర్ణాటక ఖ్యాతి మరింత ఇనుమడించనుంది. హెలికాప్టర్ల అసెంబ్లీతో పాటు, ఈ కేంద్రంలో అత్యాధునిక ఏవియానిక్స్, మిషన్ సిస్టమ్స్, డైనమిక్ కాంపోనెంట్స్‌ను కూడా అనుసంధానించనున్నారు. దీంతో ఈ ప్రాంతానికి సరికొత్త ఏరోస్పేస్ ఇంజినీరింగ్ పరిజ్ఞానం అందుబాటులోకి రానుంది.
