జనగామ జిల్లా కేంద్రంలోని కుర్మవాడకు చెందిన పర్శ సాయి అనే బాలుడి కుటుంబం ఎదుర్కొంటున్న కష్టాలపై ముఖ్యమంత్రి రేవంత్ రెడ్డి స్పందించారు. బాలుడి దీన పరిస్థితి తన దృష్టికి వచ్చిందని, తన ఆదేశాల మేరకు అధికారులు అతని ఇంటికి వెళ్లి సహాయంపై హామీ ఇచ్చారని ‘ఎక్స్’ వేదికగా పేర్కొన్నారు.
జనగామ జిల్లా కేంద్రానికి చెందిన పర్శ సాయి పుట్టుకతోనే కాళ్లు, చేతులు చచ్చుబడిపోవడంతో బాధపడుతున్నాడు. ముప్పై ఏళ్లుగా మంచానికే పరిమితమైన తన కొడుకును పోషించలేకపోతున్నానని, అతని బాధను చూడలేకపోతున్నానని, చంపేయమని తల్లి లక్ష్మి అధికారులకు మొరపెట్టుకున్నారు. తన కుమారుడికి వచ్చే పెన్షన్ డబ్బులు డైపర్లకు కూడా సరిపోవడం లేదని వాపోయారు. ఈ విషయం ముఖ్యమంత్రి దృష్టికి వెళ్లింది.
బాలుడి అనారోగ్యం, కుటుంబ ఆర్థిక ఇబ్బందుల నేపథ్యంలో అవసరమైన అన్ని సహాయ సహకారాలు అందించాలని ఉన్నతాధికారులను ముఖ్యమంత్రి ఆదేశించారు. ముఖ్యమంత్రి ఆదేశాల మేరకు రెవెన్యూ, మున్సిపల్ శాఖల అధికారులు నేడు బాలుడి ఇంటిని సందర్శించి, కుటుంబ సభ్యులతో మాట్లాడారు.
వివరాల్లోకి వెళితే, కుర్మవాడకు చెందిన పర్శ సాయి కొంతకాలంగా అనారోగ్యంతో బాధపడుతున్నాడు. అతని కుటుంబం తీవ్ర ఆర్థిక ఇబ్బందుల్లో ఉంది. ఈ విషయం ముఖ్యమంత్రి దృష్టికి చేరడంతో, సంబంధిత అధికారులకు తక్షణమే చర్యలు చేపట్టాలని ఆదేశాలు జారీ చేశారు. ఆదేశాల మేరకు రంగంలోకి దిగిన రెవెన్యూ, మున్సిపల్ అధికారులు సాయి ఇంటికి వెళ్లి పరిస్థితిని స్వయంగా పరిశీలించారు. బాలుడి ఆరోగ్య పరిస్థితి, కుటుంబ జీవన స్థితిగతుల గురించి వివరాలు అడిగి తెలుసుకున్నారు.
ఈ సందర్భంగా అధికారులు బాధిత కుటుంబానికి అండగా ఉంటామని భరోసా ఇచ్చారు. ప్రభుత్వ పథకాల ద్వారా వారికి పూర్తిస్థాయిలో సహాయం అందిస్తామని హామీ ఇచ్చారు. ఇందులో భాగంగా, వారికి ఇందిరమ్మ ఇల్లు మంజూరు చేయనున్నట్లు తెలిపారు. అలాగే, కుటుంబానికి జీవనోపాధి కల్పించేందుకు రాజీవ్ యువ వికాసం పథకం ద్వారా అవసరమైన సహాయం చేస్తామని హామీ ఇచ్చారు.
అంతేకాకుండా, అనారోగ్యంతో బాధపడుతున్న బాలుడు సాయికి మెరుగైన వైద్యం అందించేందుకు ప్రభుత్వం నిర్ణయం తీసుకుంది. అతనికి హైదరాబాద్‌లోని నిమ్స్ ఆసుపత్రిలో అవసరమైన వైద్య సహాయం అందించాలని నిర్ణయించినట్లు అధికారులు కుటుంబ సభ్యులకు తెలిపారు
