భారత ఆటోమొబైల్ రంగంలో తనకంటూ ప్రత్యేక స్థానం సంపాదించుకున్న జపనీస్ దిగ్గజం టయోటా, ఎలక్ట్రిక్ వాహనాల సెగ్మెంట్లోకి అధికారికంగా అడుగుపెట్టింది. దేశీయ మార్కెట్ కోసం తన మొట్టమొదటి పూర్తిస్థాయి ఎలక్ట్రిక్ కారు ‘టయోటా అర్బన్ క్రూయిజర్ ఎబెల్లా’ను మంగళవారం విడుదల చేసింది. ఇది ఒక మిడ్-సైజ్ ఎలక్ట్రిక్ SUV. దేశవ్యాప్తంగా ఈ కారు కోసం రూ. 25,000 టోకెన్ అమౌంట్తో బుకింగ్స్ను కూడా కంపెనీ ప్రారంభించింది. త్వరలోనే అధికారిక ధరలను ప్రకటించనుంది.
దేశంలో ఎలక్ట్రిక్ వాహనాలకు పెరుగుతున్న ఆదరణను దృష్టిలో ఉంచుకుని టయోటా ఈ కీలక నిర్ణయం తీసుకుంది. అర్బన్ క్రూయిజర్ ఎబెల్లా, మారుతీ సుజుకీ e-విటారా ప్లాట్ఫాం ఆధారంగా రూపుదిద్దుకుంది. అయితే, టయోటా తనదైన ప్రత్యేకమైన డిజైన్ మార్పులతో దీనిని మార్కెట్లోకి తీసుకొచ్చింది. ఈ కారు మార్కెట్లో ఇప్పటికే ఉన్న హ్యుందాయ్ క్రెటా ఎలక్ట్రిక్, ఎంజీ జెడ్ఎస్ ఈవీ, టాటా కర్వ్ ఈవీ వంటి మోడళ్లకు గట్టి పోటీ ఇవ్వనుంది.
బ్యాటరీ, రేంజ్ వివరాలు
టయోటా ఈ ఎలక్ట్రిక్ SUVని రెండు విభిన్న బ్యాటరీ ప్యాక్ ఆప్షన్లతో అందిస్తోంది.
1.49 kWh బ్యాటరీ ప్యాక్: ఇది 142 బీహెచ్పీ పవర్, 189 Nm టార్క్ను ఉత్పత్తి చేసే ఎలక్ట్రిక్ మోటార్తో వస్తుంది.
2.69 kWh బ్యాటరీ ప్యాక్: ఇది 172 బీహెచ్పీ పవర్, 189 Nm టార్క్ను అందిస్తుంది. ఈ వేరియంట్ ఒక్కసారి పూర్తి ఛార్జింగ్తో ARAI సర్టిఫైడ్ సైకిల్ ప్రకారం గరిష్ఠంగా 543 కిలోమీటర్ల రేంజ్ను ఇస్తుందని కంపెనీ ప్రకటించింది.
డిజైన్, ఫీచర్లు.. అదుర్స్!
ఎబెల్లా డిజైన్ విషయంలో టయోటా ప్రత్యేక శ్రద్ధ తీసుకుంది. ముందువైపు సొగసైన LED DRLలు, కొత్త బంపర్, టయోటా బ్రాండింగ్తో కూడిన గ్రిల్ దీనికి ప్రీమియం లుక్ను అందిస్తున్నాయి. 18 అంగుళాల అల్లాయ్ వీల్స్తో సైడ్ ప్రొఫైల్ ఆకర్షణీయంగా ఉంది. ఐదు మోనోటోన్, నాలుగు డ్యూయల్ టోన్ కలర్ ఆప్షన్లలో ఇది లభించనుంది.
ఇక ఇంటీరియర్ విషయానికొస్తే, క్యాబిన్లో 10.25 అంగుళాల డిజిటల్ ఇన్స్ట్రుమెంట్ క్లస్టర్, వైర్లెస్ ఆండ్రాయిడ్ ఆటో, ఆపిల్ కార్ప్లే సపోర్ట్తో 10.1 అంగుళాల ఇన్ఫోటైన్మెంట్ సిస్టమ్ ప్రధాన ఆకర్షణగా నిలుస్తున్నాయి. వీటితో పాటు పనోరమిక్ సన్రూఫ్, వెంటిలేటెడ్ ఫ్రంట్ సీట్స్, వైర్లెస్ ఫోన్ ఛార్జర్, JBL సౌండ్ సిస్టమ్, 12 రంగుల యాంబియెంట్ లైటింగ్ వంటి ఫీచర్లతో క్యాబిన్ను నింపేశారు. భద్రతకు పెద్దపీట వేస్తూ స్టాండర్డ్గా 7 ఎయిర్బ్యాగ్లు, 360 డిగ్రీ కెమెరా, లెవల్-2 ADAS (అడ్వాన్స్డ్ డ్రైవర్ అసిస్టెన్స్ సిస్టమ్స్) ఫీచర్లను కూడా అందించారు.
ధర, ఇతర ముఖ్యాంశాలు
కంపెనీ ఇంకా ధరలను అధికారికంగా ప్రకటించనప్పటికీ, దీని ప్రారంభ ధర సుమారు రూ. 18 లక్షల (ఎక్స్-షోరూం) నుంచి ఉండవచ్చని మార్కెట్ వర్గాలు అంచనా వేస్తున్నాయి. బ్యాటరీపై 8 ఏళ్ల వారెంటీ, 60% అష్యూర్డ్ బైబ్యాక్ ఆఫర్, ‘బ్యాటరీ యాజ్ ఏ సర్వీస్ (BaaS)’ వంటి ఆప్షన్లతో కస్టమర్లలో నమ్మకాన్ని పెంచే ప్రయత్నం చేస్తోంది. ఈ మోడల్తో భారత ఈవీ మార్కెట్లో టయోటా తనదైన ముద్ర వేయాలని లక్ష్యంగా పెట్టుకుంది.
