ప్రముఖ అమెరికన్ వార్తాపత్రిక ‘ది వాషింగ్టన్ పోస్ట్’లో కీలక పరిణామం చోటుచేసుకుంది. సంస్థ పబ్లిషర్, సీఈవోగా వ్యవహరిస్తున్న విల్ లూయిస్ తన పదవికి ఆకస్మికంగా రాజీనామా చేశారు. 300 మందికి పైగా జర్నలిస్టులు సహా సిబ్బందిలో మూడో వంతు మందిని తొలగిస్తున్నట్లు ప్రకటించిన మూడు రోజులకే ఆయన వైదొలగడం గమనార్హం.
శనివారం సాయంత్రం సంస్థ ఉద్యోగులకు పంపిన ఒక ఈ-మెయిల్లో లూయిస్ తన రాజీనామా విషయాన్ని వెల్లడించారు. “వాషింగ్టన్ పోస్ట్లో రెండేళ్ల పరివర్తన తర్వాత, నేను తప్పుకోవడానికి ఇదే సరైన సమయం. పత్రిక సుస్థిర భవిష్యత్తు కోసం కఠినమైన నిర్ణయాలు తీసుకున్నాం” అని ఆయన తన ఈ-మెయిల్లో పేర్కొన్నారు.
సంస్థలో తీవ్రమైన ఆర్థిక నష్టాల కారణంగా ఖర్చులను తగ్గించుకునేందుకు ఇటీవల భారీ లేఆఫ్లు ప్రకటించారు. ఈ తొలగింపుల ప్రకటన సమయంలో విల్ లూయిస్ అందుబాటులో లేకపోవడంపై విమర్శలు వచ్చాయి. ఆయన 2024 జనవరిలో సీఈవోగా బాధ్యతలు స్వీకరించారు.
విల్ లూయిస్ రాజీనామాతో సంస్థ చీఫ్ ఫైనాన్షియల్ ఆఫీసర్ (సీఎఫ్వో) జెఫ్ డి’ఒనోఫ్రియోను తాత్కాలిక పబ్లిషర్, సీఈవోగా నియమించినట్లు వాషింగ్టన్ పోస్ట్ ప్రకటించింది. కొత్త తాత్కాలిక నాయకత్వానికి తమ పూర్తి మద్దతు ఉంటుందని పత్రిక యజమాని జెఫ్ బెజోస్ ఒక ప్రకటనలో తెలిపారు.
