అధికార అహంకార గర్జన – జడ్చర్ల పోలీసులపై కాంగ్రెస్ నేతల దౌర్జన్యం
– కాంగ్రెస్ పాలనలో పోలీసులు కూడా భయపడే రోజులు వచ్చాయి
– కాంగ్రెస్ రాజ్యంలో పోలీసుల దౌర్భాగ్యం!
నాయకుల చేతుల్లో శాంతిభద్రతలు తారుమారు : మాజీ మంత్రి డా.లక్ష్మారెడ్డి విమర్శలు
మహబూబ్ నగర్ నవంబర్ 28 ( ప్రజా జ్యోతి బ్యూరో ) రాష్ట్రంలో కాంగ్రెస్ ప్రభుత్వం అధికారంలోకి వచ్చిన రెండు సంవత్సరాల వ్యవధిలో శాంతి భద్రతలు పూర్తిగా కూలిపోయాయని మాజీ మంత్రి, బిఆర్ఎస్ జిల్లా అధ్యక్షుడు లక్ష్మారెడ్డి తీవ్ర వ్యాఖ్యలు చేశారు. జడ్చర్ల పోలీస్ స్టేషన్‌లో జరిగిన ఘటనపై స్పందించిన ఆయన, “కాపాడాల్సిన పోలీసులకే రక్షణ లేకుండా పోయింది. నాయకులే పోలీసుల కాలర్ పట్టే స్థాయికి రాష్ట్ర పరిస్థితి దిగజారింది. ఇది ప్రజాస్వామ్య పాలనా.? లేక అరణ్య రాజ్యమా.?” అని ప్రశ్నించారు.1
ఇటీవల జడ్చర్లలో జరిగిన యాక్సిడెంట్ కేసులో రాజి కుదరలేదన్న కారణంతో భూత్పూర్ కాంగ్రెస్ మండల అధ్యక్షుడు పోలీస్ స్టేషన్‌లోకి దూసుకెళ్లి డ్యూటీలో ఉన్న కానిస్టేబుల్ గల్లాపట్టడం, తోసేయడం, వారించడానికి వెళ్లిన ఎస్సై జయ ప్రసాద్ పై దుర్భాషలు ఉపయోగించడం ప్రజాస్వామ్యానికి మచ్చగా నిలిచిందని లక్ష్మారెడ్డి మండిపడ్డారు.
“రాష్ట్రంలో నాయకులే గన్‌లు తీసి ప్రజలను బెదిరించే స్థితి ఏర్పడింది. సచివాలయంలోనే గన్నుతో బెదిరించిన ఘటన అందరికీ గుర్తే. ఇప్పుడు అదే సంస్కృతి పోలీస్ స్టేషన్ల వరకు చొరబడి అధికారం అడ్డంగా ఉపయోగించే స్థాయికి చేరింది” అని విమర్శించారు. పోలీసులు అధికార పార్టీకి వంగి వత్తాసు పలుకుతున్నారనే కారణంగానే ఇలాంటి సంఘటనలు పెరుగుతున్నాయని, చట్టం ముందు అందరూ సమానమనే భావనను పోలీసులు కఠినంగా అమలు చేయాల్సిన అవసరం ఉందన్నారు.
పోలీసులపై దాడికి పాల్పడిన నాయకులపై కఠిన చట్టపర చర్యలు తీసుకోవాలని డిమాండ్ చేశారు.
“పోలీసులు ఎవరు అయినా సరే – అధికార పార్టీనా.? లేక ప్రతిపక్షమా.? అని కాకుండా చట్ట ప్రకారం వ్యవహరించాలి. లేకపోతే రాష్ట్రంలో శాంతి భద్రతలు గాలిలో దీపంలా మసకబారిపోతాయి” అని లక్ష్మారెడ్డి హెచ్చరించారు.
