హైదరాబాద్లో సొంత ఇల్లు కొనుక్కోవాలనే సామాన్యుడి కల మరింత భారంగా మారింది. వేగంగా విస్తరిస్తున్న నగరంలో ఇళ్లకు పెరుగుతున్న డిమాండ్కు అనుగుణంగా ధరలు కూడా ఆకాశాన్నంటుతున్నాయి. తాజాగా విడుదలైన ఒక నివేదిక ప్రకారం, ఈ ఆర్థిక సంవత్సరంలోని జులై-సెప్టెంబర్ త్రైమాసికంలో నగరంలో ఇళ్ల ధరలు సగటున 8 శాతం పెరిగాయి.
ప్రముఖ రియల్ ఎస్టేట్ కన్సల్టెన్సీ సంస్థ అనరాక్ ఈ నివేదికను విడుదల చేసింది. దీని ప్రకారం, గత ఆర్థిక సంవత్సరం (2024-25) జులై-సెప్టెంబర్ కాలంలో హైదరాబాద్లో చదరపు అడుగు సగటు ధర రూ. 7,150గా ఉండగా, ఈ ఏడాది అదే సమయానికి అది రూ. 7,750కి చేరింది. నగరం ఔటర్ రింగ్ రోడ్ దాటి విస్తరిస్తుండటంతో అపార్ట్మెంట్లు, ఇండిపెండెంట్ ఇళ్లకు విపరీతమైన గిరాకీ ఏర్పడిందని, ఇదే ధరల పెరుగుదలకు ప్రధాన కారణంగా నివేదిక పేర్కొంది.
దేశంలోని 7 ప్రధాన నగరాల్లోనూ ఇదే తరహాలో ధరలు పెరిగాయని అనరాక్ తెలిపింది. ఈ ఏడు నగరాల్లో కలిపి సగటున ధరలు 9 శాతం పెరిగాయి. గతేడాది చదరపు అడుగు సగటు ధర రూ. 8,390 ఉండగా, ఇప్పుడు అది రూ. 9,105కి ఎగబాకింది. దేశ రాజధాని ప్రాంతం ఢిల్లీ-ఎన్సీఆర్లో లగ్జరీ ఇళ్లకు డిమాండ్ పెరగడంతో అక్కడ అత్యధికంగా 24 శాతం ధరలు పెరిగాయి. అక్కడ చదరపు అడుగు ధర రూ. 7,200 నుంచి రూ. 8,900కి చేరింది.
ఇతర ప్రధాన నగరాలైన బెంగళూరులో 10 శాతం, ముంబైలో 6 శాతం, కోల్కతాలో 6 శాతం, చెన్నైలో 5 శాతం, పుణెలో 4 శాతం చొప్పున ఇళ్ల ధరలు పెరిగాయని అనరాక్ నివేదిక వివరించింది. మొత్తంగా, పెరుగుతున్న గిరాకీ కారణంగా దేశవ్యాప్తంగా రియల్ ఎస్టేట్ రంగం దూకుడుగా ఉందని ఈ నివేదిక స్పష్టం చేస్తోంది.
