తెలంగాణ జాగృతి అధ్యక్షురాలు, ఎమ్మెల్సీ కల్వకుంట్ల కవిత బీఆర్ఎస్పైనా, మాజీ మంత్రి హరీశ్రావుపైనా సంచలన ఆరోపణలు చేశారు. అధికారం ఎవరికీ శాశ్వతం కాదని, అలా అనుకున్న వారిని ప్రజలు ఇంట్లో కూర్చోబెట్టారని వ్యాఖ్యానించారు. తనను పార్టీ నుంచి అత్యంత అవమానకరంగా, కనీసం షోకాజ్ నోటీసు కూడా ఇవ్వకుండా సస్పెండ్ చేశారని ఆవేదన వ్యక్తం చేశారు. “నేనూ తెలంగాణ బిడ్డనే. ఆకలినైనా తట్టుకుంటా కానీ, అవమానాన్ని మాత్రం తట్టుకోను” అని స్పష్టం చేశారు. ఆదివారం వరంగల్ ప్రెస్క్లబ్లో నిర్వహించిన ‘మీట్ ది ప్రెస్’ కార్యక్రమంలో ఆమె మాట్లాడారు.
20 ఏళ్లు పార్టీలో పనిచేస్తే ఇలా అవమానించి బయటకు పంపించారని కవిత వాపోయారు. ఉద్యమ సమయంలో బతుకమ్మ పేరుతో పల్లెపల్లె తిరిగిన తనను, ప్రభుత్వం ఏర్పడ్డాక ప్రొటోకాల్ పేరుతో నిజామాబాద్కే పరిమితం చేశారని అన్నారు. బీఆర్ఎస్లో తనకు ఎవరితోనూ గొడవలు లేకపోయినా, కుటుంబం నుంచే తనను బయటకు పంపారని తెలిపారు. ఇకపై బీఆర్ఎస్తో తనకు రాజకీయంగా ఎలాంటి సంబంధం లేదని, కేసీఆర్ను కేవలం కూతురిగా మాత్రమే కలుస్తానని తేల్చిచెప్పారు.
హరీశ్రావుపై తీవ్ర ఆరోపణలు
గత బీఆర్ఎస్ ప్రభుత్వంపై, ముఖ్యంగా మాజీ మంత్రి హరీశ్రావుపై కవిత తీవ్ర ఆరోపణలు చేశారు. వరంగల్ సూపర్ స్పెషాలిటీ ఆసుపత్రి పనులను రూ.1,100 కోట్ల అంచనాతో హరీశ్రావుకు చెందిన ఓ బినామీ కంపెనీకి కట్టబెట్టారని ఆరోపించారు. ఆ తర్వాత అంచనా వ్యయాన్ని రూ.1,700 కోట్లకు పెంచుకున్నారని విమర్శించారు. ఈ విషయంపై ప్రస్తుత కాంగ్రెస్ ప్రభుత్వం విజిలెన్స్ విచారణ జరిపినా, ఎందుకు చర్యలు తీసుకోవడం లేదని ఆమె ప్రశ్నించారు.
కాంగ్రెస్ ప్రభుత్వంపైనా విమర్శలు
అధికారంలో ఉన్న కాంగ్రెస్ ప్రభుత్వం పనితీరును కూడా కవిత తప్పుబట్టారు. ఏ సమస్యలనైతే లేవనెత్తి కాంగ్రెస్ అధికారంలోకి వచ్చిందో, రెండేళ్లయినా అవేవీ పరిష్కారం కాలేదని విమర్శించారు. మెగా డీఎస్సీ వెంటనే ప్రకటించాలని, గ్రూప్స్ పరీక్షలను పారదర్శకంగా నిర్వహించాలని డిమాండ్ చేశారు. తుపాన్ బాధితులకు సాయం అందించడంలో, ధాన్యం కొనుగోలులో ప్రభుత్వం నిర్లక్ష్యంగా వ్యవహరిస్తోందని మండిపడ్డారు.
ప్రస్తుతానికి తాను ప్రజా సమస్యలపైనే దృష్టి పెడుతున్నానని, ప్రత్యక్ష రాజకీయాలు చేయాలనుకోవడం లేదని కవిత తెలిపారు. అయితే, ఎన్నికలకు ఏడాది ముందు తన రాజకీయాలు కచ్చితంగా ఉంటాయని, ‘ఆడబిడ్డ రాజకీయం చేస్తే ఎలా ఉంటుందో చూపిస్తా’నని వ్యాఖ్యానించారు. రాజకీయ నేపథ్యం లేని మహిళలకు కూడా అవకాశాలు రావాలని ఆమె ఆకాంక్షించారు
