ప్రముఖ ఫార్మాస్యూటికల్ కంపెనీ లారస్ ల్యాబ్స్, 2025-26 ఆర్థిక సంవత్సరం మూడో త్రైమాసికంలో (Q3) అద్భుతమైన ఆర్థిక ఫలితాలు సాధించింది. డిసెంబర్ 31, 2025తో ముగిసిన క్వార్టర్లో కంపెనీ ఏకీకృత నికర లాభం గతేడాదితో పోలిస్తే ఏకంగా 179.4 శాతం పెరిగి రూ. 253.1 కోట్లకు చేరింది. కార్యకలాపాల ద్వారా వచ్చిన ఆదాయం కూడా 25.6% వృద్ధితో రూ. 1,778.3 కోట్లుగా నమోదైంది.
గత ఆర్థిక సంవత్సరం ఇదే త్రైమాసికంలో కంపెనీ నికర లాభం రూ. 90.6 కోట్లుగా, ఆదాయం రూ. 1,415 కోట్లుగా ఉంది. ప్రస్తుత ఆర్థిక సంవత్సరం రెండో త్రైమాసికంలో (Q2) నమోదైన రూ. 193.8 కోట్ల లాభంతో పోల్చినా తాజా ఫలితాల్లో గణనీయమైన వృద్ధి కనిపించింది. జెనరిక్స్ వ్యాపారంలో, ముఖ్యంగా యాంటీరెట్రోవైరల్ (ARV) ఔషధాల అమ్మకాలు పెరగడం, కాంట్రాక్ట్ డెవలప్మెంట్ అండ్ మాన్యుఫ్యాక్చరింగ్ ఆర్గనైజేషన్ (సీడీఎంవో) విభాగంలో డిమాండ్ బలంగా ఉండటమే ఈ వృద్ధికి కారణమని కంపెనీ వివరించింది.
ఈ ఫలితాలపై లారస్ ల్యాబ్స్ వ్యవస్థాపకుడు, సీఈవో డాక్టర్ సత్యనారాయణ చావా మాట్లాడుతూ.. “మా వ్యూహాలను విజయవంతంగా అమలు చేస్తున్నాం. సీడీఎంవో ప్రాజెక్టులలో పురోగతి, కొత్త ఉత్పత్తుల అమ్మకాలు పెరగడం, ఏఆర్వీ విభాగంలో మా నాయకత్వాన్ని బలోపేతం చేసుకోవడం వంటి అంశాలు ఈ బలమైన పనితీరుకు దోహదపడ్డాయి. పూర్తి ఆర్థిక సంవత్సరానికి నిర్దేశించుకున్న వృద్ధి లక్ష్యాలను చేరుకుంటామనే నమ్మకం ఉంది” అని తెలిపారు.
ఈ సానుకూల ఫలితాల నేపథ్యంలో శుక్రవారం స్టాక్ మార్కెట్లో లారస్ ల్యాబ్స్ షేరు విలువ సుమారు 5.5 శాతం పెరిగింది.
