సినిమా పరిశ్రమకు వేల కోట్ల రూపాయల నష్టం కలిగిస్తున్న పైరసీ ముఠాలపై హైదరాబాద్ సైబర్ క్రైమ్ పోలీసులు ఉక్కుపాదం మోపుతున్నారు. డిజిటల్ మీడియాను హ్యాక్ చేసి, కాపీరైట్ రక్షణ ఉన్న సినిమాలను వివిధ వెబ్‌సైట్ల ద్వారా పంపిణీ చేస్తున్న ముఠాల ఆట కట్టిస్తున్నారు. తాజాగా, ప్రముఖ పైరసీ వెబ్‌సైట్ ‘ఐబొమ్మ’ నిర్వాహకుడు రవిని పోలీసులు అరెస్ట్ చేశారు. నెల రోజుల క్రితమే బీహార్‌కు చెందిన అశ్వనీకుమార్ నేతృత్వంలోని మరో ముఠాను కూడా పోలీసులు అదుపులోకి తీసుకున్నారు.
విదేశాల నుంచి కార్యకలాపాలు సాగిస్తున్న రవి, తన ‘ఐబొమ్మ’ వెబ్‌సైట్‌లో సుమారు 2,000 సినిమాలను అప్‌లోడ్ చేసి కోట్ల రూపాయలు ఆర్జించినట్లు పోలీసులు గుర్తించారు. అంతేకాకుండా, సుమారు 50 లక్షల మంది యూజర్ల డేటాను కూడా సేకరించినట్లు తేలింది. ఆయన వల్ల సినిమా పరిశ్రమకు వేల కోట్ల నష్టం వాటిల్లినట్లు అధికారులు తెలిపారు.
నెల రోజుల క్రితం పట్టుబడిన అశ్వనీకుమార్ ముఠా 2020 నుంచి దేశవ్యాప్తంగా దాదాపు 500 చిత్రాలను పైరసీ చేసింది. ఈ ముఠా వల్ల దేశంలోని వివిధ చిత్ర పరిశ్రమలకు కలిపి రూ.22,400 కోట్లు, ఒక్క తెలుగు పరిశ్రమకే రూ.3,700 కోట్ల నష్టం వాటిల్లినట్లు అంచనా. ‘హిట్: ది థర్డ్ కేస్’, ‘కుబేరా’, ‘హరి హర వీరమల్లు’ వంటి భారీ చిత్రాలు కూడా వీరి పైరసీ బారిన పడ్డాయి. హ్యాకింగ్ నిపుణుడైన అశ్వనీకుమార్.. బెట్టింగ్ యాప్‌లు, టెలిగ్రామ్ చానళ్ల ద్వారా పైరసీ కాపీలను విడుదల చేసేవాడని విచారణలో వెల్లడైంది.
ఈ రెండు ముఠాలే కాకుండా మరికొన్ని ముఠాలు కూడా క్రియాశీలంగా ఉన్నాయని పోలీసులు అనుమానిస్తున్నారు. ఐపీ అడ్రస్‌లను నెదర్లాండ్స్, పారిస్ వంటి దేశాలకు మారుస్తూ కొత్త ముఠాలు దందా సాగిస్తున్నాయని, వాటిని కూడా పట్టుకోవడానికి ప్రయత్నిస్తున్నామని సైబర్ క్రైమ్ అధికారులు తెలిపారు. థియేటర్లలో క్యామ్ రికార్డింగ్ పైరసీకి ప్రధాన కారణమని, హోస్టింగ్ కంపెనీలు, ఇంటర్నెట్ సర్వీస్ ప్రొవైడర్లు (ISP) అప్రమత్తంగా ఉండాలని వారు సూచించారు.
