పండుగల సీజన్ సమీపిస్తుండటంతో, ప్రముఖ ఈ-కామర్స్ దిగ్గజాలు ఫ్లిప్కార్ట్, అమెజాన్ తమ వార్షిక సేల్స్కు రంగం సిద్ధం చేస్తున్నాయి. కొత్త స్మార్ట్ఫోన్ కొనుగోలు చేయాలని ఎదురుచూస్తున్న వారికి బంపర్ ఆఫర్లను ప్రకటించాయి. ముఖ్యంగా ఫ్లిప్కార్ట్ తన ‘బిగ్ బిలియన్ డేస్’ సేల్లో గూగుల్ పిక్సెల్ 9 సిరీస్పై కనీవినీ ఎరుగని డిస్కౌంట్లను అందిస్తోంది.
గూగుల్ పిక్సెల్పై కళ్లు చెదిరే ఆఫర్లు
ఈ సేల్లో భాగంగా గూగుల్ పిక్సెల్ 9 స్మార్ట్ఫోన్ను ఫ్లిప్కార్ట్ కేవలం రూ. 37,999 ధరకే జాబితా చేసింది. దీనికి అదనంగా బ్యాంక్ ఆఫర్ల ద్వారా మరో రూ. 2,000 తక్షణ తగ్గింపు పొందవచ్చు. పాత ఫోన్ను ఎక్స్ఛేంజ్ చేస్తే మరో రూ. 1,000 అదనపు డిస్కౌంట్ లభిస్తుంది. దీంతో అన్ని ఆఫర్లూ కలుపుకొని ఈ ఫోన్ను కేవలం రూ. 34,999కే సొంతం చేసుకోవచ్చు.
ఇదే సేల్లో ఇతర పిక్సెల్ మోడళ్లపై కూడా భారీ తగ్గింపులు ఉన్నాయి. రూ. 1,72,999 విలువైన పిక్సెల్ 9 ప్రో మోడల్ను రూ. 99,999, పిక్సెల్ 9 ప్రో ఎక్స్ఎల్ మోడల్ను రూ. 84,999కే అందించనున్నట్లు ఫ్లిప్కార్ట్ తెలిపింది. అలాగే పిక్సెల్ 8 ప్రో (రూ. 44,999), పిక్సెల్ 8ఎ (రూ. 29,999), పిక్సెల్ 7 (రూ. 27,999) కూడా ఆకర్షణీయమైన ధరలకు అందుబాటులో ఉంటాయి.
ఐఫోన్, నథింగ్ ఫోన్లపై కూడా బెస్ట్ డీల్స్
యాపిల్ ఐఫోన్ 16 (128 GB) మోడల్ను ఫ్లిప్కార్ట్ రూ. 51,999కు అందిస్తుండగా, అమెజాన్లో ఇదే ఫోన్ ధర రూ. 69,499గా ఉంది. బడ్జెట్ ఫ్రెండ్లీ ఐఫోన్ 16ఈ అమెజాన్లో రూ. 51,499కు, ఫ్లిప్కార్ట్లో రూ. 54,900కు లిస్ట్ అయింది. ఐఫోన్ 15, 15 ప్లస్ మోడళ్ల డిస్కౌంట్ ధరలు ఇంకా వెల్లడి కాలేదు.
మరోవైపు, నథింగ్ బ్రాండ్ నుంచి వచ్చిన మొదటి ఫ్లాగ్షిప్ ఫోన్ ‘నథింగ్ ఫోన్ 3’ ఫ్లిప్కార్ట్లో రూ. 34,999 ధరకే లభించనుంది. మార్కెట్లో మిశ్రమ స్పందనలు అందుకున్న ఈ ఫోన్, ఈ ధరలో ఎలాంటి ఎక్స్ఛేంజ్ ఆఫర్లు లేకుండా లభిస్తే ఇది కచ్చితంగా గొప్ప డీల్ అని నిపుణులు అభిప్రాయపడుతున్నారు. ఈ ఫోన్లో 6.67 అంగుళాల డిస్ప్లే, స్నాప్డ్రాగన్ 8ఎస్ జెన్ 4 ప్రాసెసర్, 50ఎంపీ ట్రిపుల్ కెమెరా సెటప్, 65వాట్స్ ఫాస్ట్ చార్జింగ్తో కూడిన 5,500 ఎంఏహెచ్ బ్యాటరీ వంటి శక్తివంతమైన ఫీచర్లు ఉన్నాయి.
