కోడిగుడ్డు అనగానే మనకు సాధారణంగా తెలుపు లేదా లేత గోధుమ రంగు గుర్తుకొస్తుంది. కానీ, కర్ణాటకలో ఓ కోడి ఏకంగా నీలం రంగు గుడ్డు పెట్టి యజమానితో పాటు, పశువైద్య అధికారులను సైతం ఆశ్చర్యంలో ముంచెత్తింది. ఈ అరుదైన ఘటన దావణగెరె జిల్లా చన్నగిరి తాలూకాలోని నెల్లూరు గ్రామంలో చోటుచేసుకుంది.
నెల్లూరు గ్రామానికి చెందిన సయ్యద్ నూర్ అనే రైతు రెండేళ్ల క్రితం ఒక వ్యాపారి నుంచి రూ.20 పెట్టి ఒక కోడిని కొనుగోలు చేశారు. అప్పటి నుంచి ఆ కోడి రోజూ తెల్ల గుడ్లు పెడుతోంది. అయితే, ఇటీవల అనూహ్యంగా అది నీలం రంగులో ఉన్న గుడ్డును పెట్టింది. దీంతో ఆశ్చర్యపోయిన నూర్, ఆ గుడ్డును భద్రపరిచారు. ఈ విషయం చుట్టుపక్కల గ్రామాలకు తెలియడంతో, ఈ వింత గుడ్డును చూసేందుకు ప్రజలు ఆయన ఇంటికి తరలివస్తున్నారు.
“నా దగ్గర మొత్తం పది కోళ్లు ఉన్నాయి. అన్నింటికీ ఒకే రకమైన ఆహారం పెడతాను. అవన్నీ తెలుపు లేదా పసుపు రంగు గుడ్లు పెడతాయి. కానీ ఇలా నీలం రంగు గుడ్డు పెట్టడం ఇదే మొదటిసారి” అని నూర్ తెలిపారు. ఆయన స్నేహితుడు హఫీజ్ మాట్లాడుతూ, “రెండు రోజుల క్రితం ఈ కోడి నీలం గుడ్డు పెట్టింది. నా జీవితంలో ఇలాంటి గుడ్డును ఎప్పుడూ చూడలేదు, దీని గురించి వినలేదు కూడా” అని తన ఆశ్చర్యాన్ని వ్యక్తం చేశారు.
ఈ విషయంపై పశుసంవర్ధక శాఖ సహాయ సంచాలకులు డాక్టర్ అశోక్ స్పందించారు. “ఆకుపచ్చ-పసుపు రంగు గుడ్లను నేను చూశాను. కానీ ఒక సాధారణ కోడి నీలం రంగు గుడ్డు పెట్టడం నన్ను కూడా విస్మయపరిచింది. కోడి క్లోమంలోని ‘బైలివర్డిన్’ అనే వర్ణద్రవ్యం వల్ల అరుదుగా ఇలా జరుగుతుంది” అని ఆయన వివరించారు.
మరో పశువైద్యాధికారి డాక్టర్ రఘు నాయక్ మాట్లాడుతూ, “గుడ్డు పైపొర నీలం రంగులోకి మారడానికి ఈ వర్ణద్రవ్యమే ప్రధాన కారణం. కొన్నిసార్లు జన్యుపరమైన సమస్యలు లేదా కోడి తీసుకునే ఆహారంలో మార్పుల వల్ల కూడా ఇలా జరగడానికి అవకాశం ఉంది” అని తెలిపారు.
