ఆన్లైన్ గేమింగ్ వ్యసనం మరో యువకుడి ప్రాణాన్ని బలిగొంది. చదువుకు, ఆటకు మధ్య సమన్వయం చేసుకోలేక తీవ్ర మానసిక ఒత్తిడికి గురైన 18 ఏళ్ల విద్యార్థి ఆత్మహత్య చేసుకున్నాడు. ఈ విషాద ఘటన ఉత్తరప్రదేశ్లోని లక్నోలో గురువారం చోటుచేసుకుంది. ఆన్లైన్లో డబ్బుతో ఆడే ఆటలను నిషేధిస్తూ పార్లమెంట్ బిల్లును ఆమోదించిన రోజే ఈ దుర్ఘటన జరగడం విషాదం.
లక్నోలోని గోమతినగర్ ఎక్స్టెన్షన్ ప్రాంతానికి చెందిన 12వ తరగతి చదువుతున్న విద్యార్థి తన గదిలో ఉరివేసుకొని కనిపించాడు. గురువారం ఉదయం కుటుంబ సభ్యులు గమనించి పోలీసులకు సమాచారం అందించారు. ఘటనాస్థలానికి చేరుకున్న పోలీసులు మృతదేహాన్ని పోస్టుమార్టం నిమిత్తం ఆసుపత్రికి తరలించారు. విద్యార్థి గదిలో ఒక సూసైడ్ నోట్ను స్వాధీనం చేసుకున్నారు.
సూసైడ్ నోట్లో కన్నీటి ఆవేదన
ఇంగ్లీషులో రాసిన ఆ సూసైడ్ నోట్లో విద్యార్థి తన మానసిక సంఘర్షణను వివరించాడు. “నేను ఆన్లైన్ గేమ్స్ ఆడటం వల్ల మీరంతా చాలా బాధపడుతున్నారు. గేమింగ్ మానేయాలని ఎన్నోసార్లు ప్రయత్నించినా నావల్ల కాలేదు. దీనివల్ల చదువుపై దృష్టి పెట్టలేకపోతున్నాను. భవిష్యత్తులో ఈ గేమింగ్తో డబ్బు నష్టపోయి కుటుంబానికి కష్టాలు తెచ్చిపెడతానేమోనని భయంగా ఉంది” అని ఆవేదన వ్యక్తం చేశాడు. తన చావుకు ఎవరూ కారణం కాదని, తన తర్వాత తల్లిదండ్రులు ఒకరికొకరు తోడుగా ఉండాలని కోరాడు.
ఈ ఘటనపై సీనియర్ పోలీస్ అధికారి బ్రిజ్ నారాయణ్ సింగ్ మాట్లాడుతూ.. ఆ విద్యార్థి చాలాకాలంగా ఆన్లైన్ గేమింగ్కు బానిసయ్యాడని తెలిపారు. “మొదట్లో డబ్బులు పెట్టి గేమ్స్ ఆడేవాడు. డబ్బులు అయిపోయాక ఉచిత గేమ్స్కు మారాడు” అని ఆయన వివరించారు.
ఆన్లైన్ మనీ గేమ్స్పై నిషేధం
ఆన్లైన్లో డబ్బుతో ఆడే అన్ని రకాల ఆటలను నిషేధిస్తూ ఈ-స్పోర్ట్స్, సోషల్ గేమింగ్లను ప్రోత్సహించేందుకు ఉద్దేశించిన ‘ప్రమోషన్ అండ్ రెగ్యులేషన్ ఆఫ్ ఆన్లైన్ గేమింగ్ బిల్లు, 2025’ను పార్లమెంట్ గురువారం ఆమోదించింది. యువతను ఇలాంటి వ్యసనాల బారి నుంచి, ఆర్థిక దోపిడీ నుంచి కాపాడేందుకే ఈ చట్టం అవసరమని ప్రభుత్వం స్పష్టం చేసింది. ఈ చట్టంపై దేశవ్యాప్తంగా చర్చ జరుగుతున్న సమయంలోనే ఈ విషాదం చోటుచేసుకోవడం గమనార్హం.
