బాక్సాఫీస్ వద్ద సంచలనం సృష్టించిన ‘ది కేరళ స్టోరీ’కి సీక్వెల్గా వస్తున్న రెండో భాగం విడుదలకు ముందే వివాదాల సుడిగుండంలో చిక్కుకుంది. చిత్రంలోని సున్నితమైన అంశాలు, హింసాత్మక దృశ్యాలపై సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్ సీ) ఉక్కుపాదం మోపింది. కేవలం డైలాగులకే పరిమితం కాకుండా, విజువల్స్ విషయంలోనూ బోర్డు అత్యంత కఠినంగా వ్యవహరించడం ఇప్పుడు సినీ వర్గాల్లో హాట్ టాపిక్గా మారింది.
ఈ చిత్రానికి సంబంధించి సెన్సార్ బోర్డు మొత్తం 16 మార్పులను సూచించింది. వీటిలో ప్రధానంగా అత్యాచారానికి సంబంధించిన ఒక సుదీర్ఘమైన దృశ్యాన్ని పూర్తిగా తొలగించాలని ఆదేశించింది. సమాజంపై తీవ్ర ప్రభావం చూపే అవకాశం ఉన్నందున, అటువంటి హింసాత్మక విజువల్స్కు తావులేదని బోర్డు స్పష్టం చేసింది. ఇక రొమాంటిక్ సీన్ల విషయానికి వస్తే.. ఒరిజినల్ వెర్షన్లో ఉన్న ముద్దు సీన్ల నిడివిని ఏకంగా 50 శాతానికి తగ్గించేశారు. శృంగారభరిత దృశ్యాల విషయంలో రాజీ పడకూడదని సెన్సార్ సభ్యులు నిర్ణయించారు.
కేవలం దృశ్యాలే కాకుండా, చిత్రంలోని కొన్ని కీలక సంభాషణలు కూడా మార్పులకు గురయ్యాయి. సమాజంలోని కొన్ని వర్గాలను కించపరిచేలా ఉన్న పదాలను తొలగించి, వాటి స్థానంలో అర్థం మారకుండా ఉండే ప్రత్యామ్నాయ పదాలను చేర్చాలని మేకర్స్కు సెన్సార్ బోర్డు సూచించింది. దేశ సార్వభౌమాధికారం, మతపరమైన సామరస్యాన్ని దెబ్బతీసే విధంగా ఎక్కడా చిన్న పొరపాటు కూడా జరగకూడదని సెన్సార్ బోర్డు గట్టిగా నొక్కి చెప్పింది. దీంతో చిత్ర యూనిట్ ఈ మార్పులన్నింటికీ అంగీకరించి ‘U/A’ సర్టిఫికెట్ పొందినట్లు సమాచారం.
ఈ సినిమా తొలి భాగం కేరళలో జరిగిన మత మార్పిడుల నేపథ్యంలో వచ్చి దేశవ్యాప్తంగా చర్చలకు దారితీసింది. ఇప్పుడు రెండో భాగంలోనూ అటువంటి వివాదాస్పద అంశాలనే టచ్ చేసినట్లు సెన్సార్ కట్లను బట్టి అర్థమవుతోంది. అయితే, సెన్సార్ బోర్డు విధించిన ఈ ఆంక్షలు సినిమాను ఏ మేరకు దెబ్బతీస్తాయి? లేక ఈ వివాదాలే సినిమాకు మరింత పబ్లిసిటీ తెచ్చి పెడతాయా? అన్నది వేచి చూడాలి. ఏదేమైనా, సినిమా నిడివి తగ్గినా.. ప్రభావం మాత్రం తగ్గకూడదని దర్శకుడు సుదీప్తో సేన్ బృందం భావిస్తోంది.
