నాగయ్య ప్రాణరక్షణలో హైటెక్ సిటీ యశోద హాస్పిటల్ అద్భుతం
-జీవితాంతం వైద్యులకు రుణపడి ఉంటాను”
నాగయ్య
సీనియర్ కన్సల్టెంట్ కార్డియోథొరాసిక్ సర్జన్ డాక్టర్ విక్రమ్ రెడ్డి ఐరా
కరీంనగర్ బ్యూరో, సెప్టెంబర్ 16, (ప్రజాజ్యోతి)
యశోద హాస్పిటల్స్, హైటెక్ సిటీ బ్రాంచ్‌లో కరీంనగర్‌కు చెందిన 64 ఏళ్ల నాగయ్య కి అరుదైన గుండె-రక్తనాళ శస్త్రచికిత్స విజయవంతమైందని, అయోర్టిక్ ఆర్చ్ వద్ద పెద్ద అనూరిజంతో ప్రాణాంతక స్థితిలో ఉన్న నాగయ్య నేరెల్ల అనే వ్యక్తిని ‘ఆర్చ్ డిబ్రాంచింగ్’, ‘ఫ్రోజెన్ ఎలిఫెంట్ ట్రంక్’ అనే అత్యంత క్లిష్టమైన పద్ధతుల ద్వారా కాపాడినట్లు సీనియర్ కన్సల్టెంట్ కార్డియోథొరాసిక్ సర్జన్ డాక్టర్ విక్రమ్ రెడ్డి ఐరా తెలిపారు.మంగళవారం నగరంలోని యశోద హాస్పిటల్ బ్రాంచ్ లో ఏర్పాటు చేసిన విలేకరుల సమావేశంలో ఆయన మాట్లాడుతూ. నాగయ్య కి నిరంతర దగ్గు, గొంతు బొంగురుపోవడం, ఛాతీ నొప్పి వంటి లక్షణాలు ఉన్నాయని తెలిపారు. పరీక్షల్లో అయోర్టిక్ ఆర్చ్ వద్ద పెద్ద సాక్యులర్ అనూరిజం ఉందని, ఇది చీలితే ప్రాణాలకే ప్రమాదమని గుర్తించామన్నారు. జూన్ 7న తమ బృందం ఈ అత్యంత క్లిష్టమైన శస్త్రచికిత్సను విజయవంతంగా పూర్తి చేసిందని వివరించారు. ఈ పద్ధతిలో రక్తనాళాన్ని పునరుద్ధరించి సాధారణ రక్తప్రవాహాన్ని పునరుద్ధరించవచ్చని, ఇది అత్యంత సాంకేతిక నైపుణ్యం, సమన్వయం అవసరమయ్యే ఆపరేషన్ అని తెలిపారు. శస్త్రచికిత్స అనంతరం రోగి వేగంగా కోలుకుని, ఎలాంటి సమస్యలు లేకుండా జూన్ 12న డిశ్చార్జ్ అయ్యాడని వివరించారు. ఈ విజయానికి తమ కార్డియోథొరాసిక్, అనస్థీషియా, ఐసీయూ, నర్సింగ్ బృందాల సమిష్టి కృషి కారణమని చెప్పారు.
*యశోద వైద్యులకే నా కృతజ్ఞతలు..*
శస్త్రచికిత్స తర్వాత కోలుకున్న నాగయ్య నేరెల్ల మాట్లాడుతూ, కొన్ని నెలలుగా రక్తపోటుతో పాటు దగ్గు, గొంతు బొంగురుపోవడం, ఛాతీ నొప్పి సమస్యలు వేధించాయని చెప్పారు. అనూరిజం ఉన్నట్లు తెలిసినప్పుడు తాను, తన కుటుంబం భయపడ్డామని, అయితే డాక్టర్ విక్రమ్ రెడ్డి ఐరా, డాక్టర్ శివ శంకర రెడ్డి తలపరెడ్డి ధైర్యం చెప్పారని వివరించారు. ఈ రోజు ఆరోగ్యంగా మాట్లాడగలుగుతున్నానంటే యశోద వైద్యుల శ్రద్ధ, నైపుణ్యమే కారణమని, వారికి జీవితాంతం రుణపడి ఉంటానని భావోద్వేగంగా చెప్పారు. తనలాంటి సమస్యలున్న వారు చిన్న లక్షణాలను కూడా నిర్లక్ష్యం చేయవద్దని, సమయానికి సరైన వైద్యం ఉంటే ఎలాంటి సమస్యనైనా జయించవచ్చని సలహా ఇచ్చారు.
*కొత్త జీవితం ఇచ్చిన యశోద..*
నాగయ్య కుమారుడు డాక్టర్ వంశీధర్ రెడ్డి మాట్లాడుతూ, తమ కుటుంబం మొదట తమ తండ్రికి సాధారణ రక్తపోటు సమస్యగా భావించిందని, కానీ లక్షణాలు పెరగడంతో ఆసుపత్రికి వెళ్లామని తెలిపారు. ఆపరేషన్ తప్ప వేరే మార్గం లేదని వైద్యులు చెప్పినప్పుడు కుటుంబం మొత్తం గందరగోళానికి గురైందని, అయితే యశోద వైద్యులు ధైర్యం చెప్పారని వెల్లడించారు. డాక్టర్ విక్రమ్ రెడ్డి ఐరా, డాక్టర్ శివ శంకర రెడ్డి తలపరెడ్డితో పాటు కార్డియోథొరాసిక్ బృందం, అనస్థీషియా, ఐసీయూ సిబ్బందికి హృదయపూర్వక కృతజ్ఞతలు తెలిపారు. యశోద హాస్పిటల్స్ ఆధునిక సాంకేతికత, వైద్యుల అద్భుత నైపుణ్యం వల్లే తమ తండ్రి కొత్త జీవితం పొందారని చెప్పారు.
ఈ సమావేశంలో యశోద హాస్పిటల్ సిబ్బంది వైద్యులు పాల్గొన్నారు.
