జమ్మూకశ్మీర్‌ను భారీ వర్షాలు, వరదలు అతలాకుతలం చేస్తున్నాయి. కుండపోత వానల కారణంగా సంభవించిన వేర్వేరు ఘటనల్లో నలుగురు ప్రాణాలు కోల్పోగా, ప్రఖ్యాత వైష్ణోదేవి యాత్రకు అంతరాయం కలిగింది. దోడా జిల్లాలో ఆకస్మిక వరదలు, కొండచరియలు విరిగిపడటంతో తీవ్ర నష్టం వాటిల్లింది. అధికారులు సహాయక చర్యలను ముమ్మరం చేశారు.
దోడా జిల్లాలో కురిసిన భారీ వర్షాలకు ఓ ఇల్లు కూలిపోవడంతో ఇద్దరు మరణించగా, ఆకస్మిక వరదల్లో చిక్కుకుని మరో ఇద్దరు మృతి చెందినట్లు అధికారులు తెలిపారు. ఈ జిల్లాలో మేఘ విస్ఫోటనం (క్లౌడ్‌బరస్ట్) కూడా సంభవించినట్లు సమాచారం. నదులు, వాగుల వద్దకు వెళ్లవద్దని, ప్రజలందరూ అప్రమత్తంగా ఉండాలని జిల్లా యంత్రాంగం హెచ్చరికలు జారీ చేసింది. భారీ వర్షాలు, కొండచరియల కారణంగా దోడా, కిష్త్వార్ జిల్లాలను కలిపే జాతీయ రహదారి-244 కొంత భాగం కొట్టుకుపోవడంతో వాహనాల రాకపోకలు నిలిచిపోయాయి.
మరోవైపు, వైష్ణోదేవి పుణ్యక్షేత్రానికి వెళ్లే మార్గంలో కొండచరియలు విరిగిపడ్డాయి. అధ్క్వారీలోని ఇంద్రప్రస్థ భోజనాలయ సమీపంలో ఈ ఘటన చోటుచేసుకుంది. ఈ ప్రమాదంలో పలువురికి గాయాలైనట్లు సమాచారం. వెంటనే స్పందించిన అధికారులు సహాయక చర్యలు చేపట్టి, యాత్రను తాత్కాలికంగా నిలిపివేశారు.
జమ్మూ లోని అనేక ప్రాంతాల్లో పరిస్థితి చాలా తీవ్రంగా ఉందని సీఎం ఒమర్ అబ్దుల్లా తెలిపారు. “పరిస్థితిని స్వయంగా పర్యవేక్షించేందుకు శ్రీనగర్ నుంచి జమ్మూకు బయలుదేరుతున్నాను. అత్యవసర పునరుద్ధరణ పనుల కోసం జిల్లా కలెక్టర్లకు అదనపు నిధులు విడుదల చేయాలని ఆదేశాలు జారీ చేశాం” అని ఆయన ‘ఎక్స్’ వేదికగా వెల్లడించారు. వరద సంసిద్ధతపై ఆయన ఉన్నతస్థాయి సమావేశం నిర్వహించి, అన్ని శాఖలను సిద్ధంగా ఉండాలని ఆదేశించారు.
ప్రధాన నదులైన తావి, రావి ప్రమాద స్థాయిని మించి ప్రవహిస్తున్నాయి. కథువా జిల్లాలో రావి నది ఉప్పొంగడంతో లోతట్టు ప్రాంతాలు జలమయమయ్యాయి. రాంబన్ జిల్లాలో కొండరాళ్లు దొర్లిపడుతుండటంతో శ్రీనగర్-జమ్మూ జాతీయ రహదారిని… జోజిలా పాస్ వద్ద భారీగా మంచు కురుస్తుండటంతో శ్రీనగర్-లేహ్ జాతీయ రహదారిని మూసివేశారు. ప్రభావిత జిల్లాల్లో అధికారులు హెల్ప్‌లైన్ నంబర్లను ఏర్పాటు చేసి, సహాయక చర్యలను పర్యవేక్షిస్తున్నారు. జమ్మూలో భారీ వర్షాలు కొనసాగవచ్చని వాతావరణ శాఖ హెచ్చరించింది.
